周六凌晨西甲獨腳戲，切爾達將會主場硬撼艾拉維斯（藍衫），等阿King度條過關醒大家。神奇球隊艾拉維斯聯賽至今交出超水準發揮，表現令人眼前一亮，今場對住狀態飄忽嘅切爾達有望偷雞，讓球客勝咪錯過。
（Now 632周六凌晨3時直播）
上季長期頹勢排聯賽下游嘅艾拉維斯，今季脫胎換骨，聯賽開咧即有好開局，繼早前5比1橫掃華歷簡奴之後，上輪仲爆冷1比0擊敗皇家馬德里，暫時高踞積分榜第6位，氣勢如虹。相反切爾達兩位進攻主力麥斯高美斯同伊亞高艾斯巴斯，啱啱踢完太公波歸隊，體能肯定輸蝕，未必可以全力迎戰，今場仲有守將尼斯達阿拿祖停賽，防線實力大打折扣，艾拉維斯受讓捧讓球客勝啱數。
河床留力吼細盤
朝早幾場阿甲賽事，其中沙士菲主場迎戰甘拿斯亞；沙士菲喺自己地頭出擊表現夠硬淨，近4仗主場取3勝1和，今場有力全取3分，主勝值博。
最後仲有河床作客面對高隆，早前闖入自由盃4強嘅河床，嚟緊要火併巴甲勁旅甘美路，今場聯賽肯定留力，況且高隆主場向來踢得保守，5仗主場4次開2球或以下，細盤要得過。
（Now 639及有線655台周六早上8時15分直播）
