周六澳職獨腳戲上演「墨爾本打吡」，墨爾本勝利主場迎戰墨爾本城。上季季後賽盟主墨爾本勝利近5次於同市打吡4度擊敗墨爾本城，而且今季仲獲得本田圭佑、托禾倫2大猛將加盟，實力如虎添翼，有力打響頭炮，平手盤必捧墨爾本勝利。
（Now 639、有線655及615台周六下午4時50分直播）
墨爾本勝利上季常規賽雖然僅得第4名，不過去到季後賽重振雄風，先後擊敗阿德萊德聯、FC悉尼及紐卡素噴射機，第4次贏得季後賽冠軍，亦係歷來首支以「4哥」身份贏得季後賽嘅球隊，今季佢哋雖有上季捧盃功臣及澳職史上士哥王貝利沙離隊，不過補入嘅日本天王本田圭佑同瑞典前國腳托禾倫，無論喺卡士、星味比貝利沙絕對有過之而無不及，加上巴巴路西斯、杜羅奧斯等原有主力繼續留效，絕對有力重奪失落3季嘅常規賽冠軍。
墨城作客戰績曳
墨爾本城今季有費斯格拉特、畢特辛斯基、丹尼爾阿辛尼及米高積及臣等人離隊，新加入球員有曾效力曼聯及阿士東維拉嘅比利時守將迪拿特、布魯日中場拉利麥基爾等新血，配合舊將烏拉圭射手科拿路利，戰鬥力應該唔會太大倒退，不過佢哋作客成績一向麻麻，上季13場常規賽作客只有3場冇失波，其餘10場加埋失18球，防線唔算穩陣，加上墨爾本城近5次鬥勝利輸咗4次，踢法似被勝利恰死，作客贏波有難度，平手盤一於捧墨爾本勝利。
