今晚直播禾夫斯堡主場對拜仁慕尼黑，拜仁尋日連開兩個記者會，第一個係尼高高華（小圖）賽前發布會，第二個至係3巨頭同傳媒講話，尼高高華聲稱拜仁喺國際賽休戰期已經做好準備，今晚有信心喺大眾汽車球場贏得令人信服嘅一仗，打破各項賽事4場不勝嘅困局。
（on.cc東網周六晚9時30分直播）
近4次作客禾堡全勝入13球
尼高高華話經過同球員對話之後，全隊目前士氣高昂，每位球員都好想落場幫助球隊尋求反彈，較早前受傷嘅左閘阿拉巴亦已經康復，現時陣中只有京士利高文同哥倫天杜利素兩名傷兵，喺好多位置上佢都面對取捨嘅煩惱，佢話喺操練中見到班球員經過一輪低潮後有明顯嘅調整，相信今晚會有令人滿意表現。
禾夫斯堡季初趁其他球隊未上力連贏兩場係威係勢，不過教練拉巴迪亞喺德甲多年，成績一向麻麻，佢嘅戰術同調兵遣將功力始終未夠班，兩場虛火之後就無以為繼，近5輪聯賽未贏過只得3分，表現急速下滑，事實上禾堡個別球員質素雖然唔差，但攻守組織始終都唔夠流暢，搞到經常要靠麥斯美艾洛特、尤路斯馬爾尼等靠個人之力得分，面對整體實力高佢哋唔只一皮嘅拜仁實在好難偷雞。睇番拜仁近4次作客禾夫斯堡取得全勝之餘，仲合共轟入13球，大眾汽車球場明顯係佢哋嘅福地，預期今晚有力大反彈，拜仁讓一球、球半唔算多，黑柴撐上盤。
