周日凌晨西甲榜首大戰，巴塞隆拿將會主場出擊迎戰西維爾。暫時屈居聯賽第2嘅巴塞，為重奪榜首位置，呢場肯定搶攻，加上西維爾火力亦都唔失禮，兩隊呢場鬥攻格，隨時有入球騷睇，中位數3.5球入球大係好路。
（Now 632周日凌晨2時45分直播）
不嬲由皇馬、巴塞主導嘅西甲聯賽，今季榜首爭奪異常激烈，皆因兩支傳統巨頭齊齊失準，尤其上季一直堅持到季尾，先畀對手打破不敗金身嘅巴塞，今季早早就吞下首場敗仗，近6仗聯賽場場都有失波。表現咁飄忽，同球隊後防人腳唔齊整有好大關係，兩位守將烏姆迪迪同華美倫都有傷在身，防守表現肯定受影響，好彩前場有球王美斯擔大旗，帶領巴塞至今狂轟19球，絕對係聯賽火力最強一隊，呢場佢哋想搶分惟有以攻代守。
「新C朗」安達施華大爆發
今季開局強勢嘅西維爾，上輪擊敗切爾達之後，成功坐正1哥位置，呢場作客挑戰巴塞，後防主將卡積亞賽前就講到明唔會一味「泊大巴」，信心十足，全因佢哋前場實力有保證，尤其新加盟嘅葡萄牙「新C朗」安達施華大爆發，至今個人攻入7球高踞射手榜前列，搭住法國前鋒賓耶達等進攻好手，絕對有本錢攻破巴塞後防，兩隊呢場勢必上演對攻戰，大盤肯定冇雞。
