莫帥亂咁嚟曼聯冇章法
今晚英超早場上演重頭戲，今季保持不敗嘅車路士主場迎戰褪色勁旅曼聯；紅魔季初表現可謂「保持水準」——就係一貫地差，唔好忘記對手仲要唔算強，唯一Big6對決就係慘吞熱刺3蛋，以致球員向莫連奴逼宮之說甚囂塵上，故今場作客史丹福橋不宜存太多幻想，樂比捧車仔讓半一上盤。
（Now 621周六晚7時30分直播）
曼聯早前創下英超最差開季成績後，上輪鬥紐卡素「重現魔性」反勝3比2，令一眾反曼聯球迷鬆一口氣，點解？事關曼聯領隊莫連奴帥位危在旦夕，有傳成績有乜依郁即刻炒魷，依家莫帥吊住條命，睇怕之後都惡唔出樣，因此敵對球迷自然拍爛手掌，希望曼聯可繼續沉淪落去。
紅魔防線崩壞
究竟曼聯班友仔係咪故意踢得差趕走莫帥？老實講冇證冇據真係無從稽考，但有樣嘢可以肯定，就係球員對莫帥戰術無所適從，套用曼聯名宿史高斯近期嘅名句，就係將美斯放落呢隊曼聯，都會被廢咗武功；紅魔依家進攻冇章法人所共知，最慘係連防線都完全崩壞，對住以冇入球能力見稱嘅紐卡素都可以失2球，就知道情況有幾恐怖。
反觀車路士目前就同曼城、利物浦撐到行，3隊目前都係6勝2和鬥得緊湊。「新車路士」之所以成功，全因領隊沙利只係微調車仔既有陣容，而冇硬生生將自己一套搬過嚟，主力正選只加入「節奏拍子機」佐真奴費路，令一眾球員好快適應新體系嘅踢法。
夏薩特弗到漏油
車仔今季最厲害之處當然係夏薩特嘅大爆發，佢持續嘅出色表現，今季已經有7個英超入球進帳，呢一刻絕對夏薩特職業生涯高峰，以曼聯全英超失波第4多嘅防線，實在好難守得住呢位比利時球星。值得留意係車仔之前4位領隊都腳頭甚好，首戰對曼聯都能夠贏波而回，相信沙利都可以保持呢個優良傳統。
