歐洲各地聯賽進入最後衝刺階段，法甲榜首除咗巴黎聖日耳門已穩奪冠軍，來屆歐聯、歐霸資格仲有唔少變數，今晚有場獨腳戲正正關乎前列排名，聯賽榜4哥聖伊天將於主場硬撼排第5位嘅蒙彼利埃，兩軍臨近季尾狀態弗到漏，信心爆棚隨時上演對攻好戲，入球大可放心捧場。（myTV Gold 302、Now 639、有線615及655台周六凌晨2時45分直播）
由於今季法聯盃及法足盃分別由斯特拉斯堡及雷恩奪得，因此只有聯賽前4名可以出戰下屆歐洲賽。聖伊天依家以35戰得62分排第4，只以1分落後第3位嘅里昂，有力衝擊歐聯資格，佢哋近7場聯賽豪取6勝1和，加上最後2場聯賽都有主場之利，士氣、信心一流。不過蒙彼利埃近4場聯賽3勝1和，僅落後聖伊天7分，只要今場贏波，數字上仲有機會爭奪歐霸參賽席位，中位數開2.5/3球，大盤值得作為過關重心。
南錫護級反咬梅斯
其餘兩關集中講法乙，榜首梅斯提早兩輪宣布贏得聯賽冠軍及直接升班資格。今場作客對南錫，隨時有保留。南錫護級仲未上岸，今次主場出擊決心十足，揀主勝。最後比斯特今場贏波即可攞直接升班資格，對手尼奧特排中游無欲無求，捧讓球主勝。
