擸常規賽冠軍未夠喉
周五晚上澳職季後賽4強戰，珀斯光輝將會主場鬥阿德萊德聯。常規賽盟主光輝主場戰績彪炳，尤其射手安迪基奧治最鍾意喺主場球迷面前騷哥利搶士哥，今仗面對作客演出飄忽嘅阿德萊德聯，光輝有力乘主場之利擊敗對手，主勝不容錯過。
（MyTV Gold 302、Now 639、有線615及655台周五晚6時30分直播）
光輝今季常規賽表現所向披靡，聯賽大部分時間都穩佔1哥位置，最終提早2輪鎖定球會史上首座澳職冠軍，打破光輝近15年無冠嘅尷尬局面。不過主帥普波域同一班愛徒似乎仲未滿足，已經將目光放喺澳職季後賽總冠軍之上。光輝強勁主場成績係球隊今屆奪冠嘅主因，尤其近6仗主場聯賽豪取5勝，5場勝仗力保不失之餘，其中4次更加贏對手2球或以上，優勢明顯。光輝頭號射手安迪基奧治近5次主場上陣斬獲6球，絕對係佢地前場最具威脅嘅得分好手。
阿德萊德聯攻力疲弱
阿德萊德聯上仗於淘汰圈贏得驚險，同墨爾本城惡戰120分鐘，最後靠中場賀路雲一箭定江山，始能進身季後賽4強，睇到一班阿聯球迷一額汗。查實阿德萊德聯喺27輪常規賽事，只取得37球，屬澳職攻擊力第2差嘅球隊，今場作客就更加濕滯。翻查往績，阿聯近3次面對光輝未贏過之餘，仲要1球都入唔到，今仗形勢不容樂觀，寧捧1.57倍主勝好過。
