今晚重頭戲當然係3哥RB萊比錫主場對榜首拜仁慕尼黑，德甲剩低兩輪，拜仁目前領先次席多蒙特4分，今晚只要作客贏波就可以提早封王，下輪主場聯賽可以留吓力，蓄銳等德國盃決賽，戰意唔使懷疑，至於萊比錫無論贏輸都已篤定第3，不過主場謝幕戰兼冇壓力下打老虎，當然唔會放軟手腳，雙方前線猛將如雲，今場預期係大駁火，博有2.13倍嘅中位數3.5球大盤。
萊比錫教頭蘭歷克賽前講明，雖然勝負唔影響聯賽排名，但佢個人就極希望贏波謝幕，因為下季佢會回歸總監職務，讓位畀由賀芬咸加盟嘅拿高斯文領軍，如果今場能夠成功阻止拜仁提早封王，對佢同萊比錫球迷嚟講都係一個美好回憶，何況萊比錫喺兩星期後就會同拜仁會師德國盃決賽，若然今場贏波肯定會增強爭盃信心。萊比錫前線近期火力全開，不過防線表現就冇季初咁穩陣，今場同拜仁搶攻預咗入得又失得。
拜仁烏里治作客場場失波
對於備受壓力嘅拜仁教頭尼高高華嚟講，今季剩低嘅德甲同德國盃都志在必得，今晚戰意當然唔使懷疑，就算作客都會搶攻求勝，不過球隊最具防守力嘅門將紐亞，同世界級防守中場查維馬天尼斯雙雙因傷缺陣，防線實力受損，睇番副選門將烏里治今季喺德甲踢咗7場，除主場小勝雲達不來梅外，場場都有失波，包括4場作客賽事，今場作客當然有隱憂，最佳投注策略都係捧大盤啦！
