至於同時舉行嘅賀芬咸對雲達不來梅，我哋都有直播，呢場賀芬咸除咗主場謝幕外，賽後仲安排咗萊茵內卡球場喺今季嘅閉幕儀式，兼畀機會主場球迷送別教練拿高斯文同佢嘅教練團，仲有即將轉投利華古遜嘅中場大腦迪米阿巴爾，全隊上下當然唔想破壞氣氛，面對近期接連受挫兼殘陣嘅不來梅有力大勝一仗，推介1.9倍嘅讓球主勝。
拿高斯文下季將會轉投RB萊比錫，賽前佢講明好期待今晚嘅球迷送別儀式，仲講明希望球員識做，踢場好波攞好成績畀佢做賀禮，賀芬咸近兩仗只得1分，但計表現其實絕對唔曳，尤其上輪作客慕遜加柏狂攻下兩度領先都畀人追和，確實頂住道氣，不過拿高斯文話只要攞晒餘下6分，爭踢歐霸甚至歐聯都仲有可能，今晚主場謝幕就算領先咗都唔會收油，一於盡情數胡與球迷同樂！
不來梅今季表現同樣令人滿意，但近期亦同樣踢得唔錯而攞唔到好成績，近3場只得1分下，爭下屆歐戰入場券已經十分渺茫，何況今仗仲要陣容不整，近況巔峰嘅中場卡拉臣停賽，另外兩位中場巴菲迪同巴迪爾斯養傷，作客遇賀芬咸凶多吉少。
