英超「2哥」利物浦今晚喺主場迎戰狼隊。「紅軍」上周中喺歐聯4強反勝巴塞隆拿殺入決賽，創造「大奇迹日」，士氣爆燈，王牌穆罕默德沙拿今場有望復出，力爭神射手榮譽外更希望幫「紅軍」再創歷史，利記上下目標鮮明，讓球半、兩球照捧2.05倍上盤！
（Now 622周日晚10時直播）
沙拿復出數胡搶金靴
利物浦依家落後曼城1分，爭標形勢雖然被動，但經過上場歐聯反勝巴塞後，相信冇人敢講「紅軍」輸梗，只要今場佢哋早開紀錄，必定會令同時間開波嘅曼城壓力大增，趁住主場氣勢瘋狂搶攻，希望絕境求存，贏得球會夢寐以求嘅首座英超獎盃。除咗冠軍之爭夠激烈，今季神射手一樣鬥到最尾，沙拿依家喺射手榜以22球領先，阿古路、奧巴美揚及沙迪奧文尼則以20球緊隨其後，相信沙拿及文尼今場都會力爭士哥，絕對唔會錫身。
狼隊今季雖有「Big 6殺手」美譽，不過季尾狀態及戰意都稍見跌Watt，何況佢哋今場無論輸贏都篤定留守第7名，決心自然比唔上志切爭標嘅利物浦。「紅軍」全季努力有冇收穫都係睇今鋪，喺1分都不能少嘅情況下，領先1粒唔穩陣，讓球半/兩球照捧上盤。
