從上年8月開鑼到今晚煞科，今季英超精彩到暈。首先衞冕嘅曼城繼續高水準，踢出令人賞心悅目兼有成績嘅足球，現時仍有望爭做3冠王；緊隨其後嘅利物浦，經過主帥高普幾年重建，循序漸進地重返爭標行列，今季同曼城鬥到煞科日前都未分高下，球迷抱着「You will never walk alone」（你永遠不會獨行）嘅態度支持球隊，成為「紅軍」鬥爭到最後一刻嘅原動力。
曼聯冇嘢爭 最失望Big 6
同於今季易帥嘅倫敦雙雄車路士及阿仙奴，開咧表現其實不俗，可惜踏入季中相繼崩潰，猶幸仍齊齊殺入歐霸盃決賽，算係有所交代；另一支倫敦勁旅熱刺，在零增兵及季中傷兵滿營下，竟喺歐聯連挫曼城及阿積士殺入決賽，確實難能可貴，領隊普捷天奴居功至偉；相反投入不少嘅曼聯雷聲大、雨點小，無論係摩連奴還是臨危受命嘅蘇斯克查，始終未能重拾費格遜時代光輝，令球迷失望。
上述Big 6今晚對手偏弱，佢哋要贏波難度不大，煞科日最大懸念就係「藍紅爭冠」，據我所知兩軍部分本港粉絲，已經前赴英倫，希望見證愛隊捧盃時刻，到底係曼城衞冕成功？定係利物浦一搔29年之癢，首奪英超錦標呢？無論如何，今季英超由頭到尾都咁「好味」。
