王者之戰半和穩
今晚深夜意大利盃王者之戰，拉素強戰阿特蘭大，on.cc東網繼續直播見證王者誕生。拉素近期狀態一般，與箭頭恩莫比尼腳風唔順大有關係，阿特蘭大雖勇但大賽經驗不足，作客一定小心謹慎，加上兩軍近年對賽常開半場和，在一場過決勝負嘅決賽場合，更加唔敢亂攻，半場和值得再追。
（on.cc東網周四凌晨2時45分直播）
由於賽會早已安排決賽在奧林匹高球場舉行，令曾6奪意盃冠軍嘅拉素獲得主場之利，不過呢支首都球隊狀態差勁，聯賽連盃賽在內，近9場僅得4勝，爭入聯賽前4機會渺茫。拉素成績之所以大跌Watt，全因陣中首席射手恩莫比尼近11場僅得1個士哥，面對鋒力強勁嘅阿特蘭大，料拉素今場應會先鞏固防守，再謀後動。
阿特蘭大作風慢熱
阿特蘭大喺「進攻狂帥」加斯柏連尼領軍下，殺上聯賽前4，但佢哋上次捧意盃已經係56年前嘅事，就算入決賽亦要數到1995至96年度球季，眾將大賽經驗相當不足，初登決賽難免會畏首畏尾。查實阿軍作風慢熱，近7場有6次開半場和，甚少喺上半場搶到先機，加上兩軍近5次交手，亦有4次開半場和，包括本月初聯賽阿特蘭大作客贏拉素3比1，半場亦係打和1比1，決賽場合會更加保守，半場和有計。
