公平政策達標士氣大振
今晚意甲尾場之一爆發前列大戰，「2哥」拿玻里主場硬撼「3哥」國際米蘭。國米啱啱通過歐洲足協財政公平政策，連同後防主力史堅尼亞續約，士氣大振，為保下屆歐聯入場券，戰意遠勝已篤定攞亞軍嘅拿玻里，必捧下盤。
(myTV Gold 303、Now 639、有線655及615台周一凌晨2時30分直播)
國米上年因違反歐洲足協財政公平政策嘅部分條款，因此被罰今屆出戰歐聯名單，由正常嘅25人縮減至22人，好彩經過一季努力後，國米已達到歐洲足協財政公平政策嘅要求，嚟緊下屆參加歐洲賽唔使再縮人，買人亦可鬆手啲。除此之外，近兩季表現穩定、備受巴塞及曼城等豪門垂青嘅中堅史堅尼亞，決定同球隊續約至2023年6月，留得住呢位斯洛伐克國腳，絕對係雙喜臨門。
拿玻里篤定亞軍戰意成疑
雖然拿玻里只係比國米高一位，但查實已經甩開10分，肯定取得聯賽亞軍，戰意成疑，就算近3場聯賽全勝，睇番對手只屬史帕爾、卡利亞里、費辛隆尼之流，不足為信。相反，國米近7仗聯賽未輸過，包括賽和祖雲達斯、羅馬、阿特蘭大等前列分子，表現更值得信賴，加上兩軍近3次交手，國米都保持不敗兼不失波，依家佢哋只領先第5及6位嘅AC米蘭、羅馬3分，為保前4嘅下屆歐聯入場券，今仗不容再失，仲有得受讓平半，下盤乃不二之選。
