法甲今晚煞科，聯賽冠軍及所有歐洲賽資格已經塵埃落定，最後一輪焦點將會落喺降班球隊身上。現時除咗包尾嘅甘岡篤定乙組見，另一支直接降班球隊及附加賽資格仲有變數；排尾3嘅卡昂今晚主場鬥波爾多，贏波有機會逃出生天，輸波卻有可能直接降班，稱得上係生死戰。波爾多聯賽6連敗擺明等收咧，卡昂主勝值得熱捧，如果想好分可敲「讓球和」。
（周六凌晨3時05分開賽）
現時榜末形勢，甘岡只得27分肯定降班，卡昂領先尾2嘅迪安2分，同時比尾4嘅艾米恩斯少2分，卡昂贏波至少唔使直接降班，仲有機會趁艾米恩斯失分，升上尾4直接護級成功；不過一旦卡昂輸波，另邊廂嘅迪安喺主場擊敗圖盧茲，卡昂就會跌落尾2直接降班，所以形勢上卡昂都唔可以放軟手腳。卡昂對上2場主場先後擊敗迪安及蘭斯，相反排第14位嘅波爾多聯賽6連敗，卡昂1.4倍值得熱捧，如果想要好分頭仲可敲讓球和，事關卡昂今季聯賽7場勝仗有6次都係贏1粒，而波爾多近5場聯賽輸波亦係僅輸1球，睇怕呢場都係1球上落。
摩納哥求1分「細」磨尼斯
至於今晚直播戲碼有摩納哥作客鬥尼斯。摩納哥領先卡昂3分，數字上仲有可能淪落踢護級附加賽，但今場攞1分就可以安寢無憂。尼斯今季37場聯賽僅入28球，係法甲入波第2少球隊，今場捧細盤最好路。
（myTV Gold 302、Now 639及714、有線615及655台周六凌晨3時05分直播）
