今日有3場附加賽，啱啱好整條3串1玩。法乙升班附加賽，由「4哥」巴黎FC主場迎戰位列第5的朗斯，巴黎FC踢法極度穩陣，今季38場聯賽有22場開出半場和，比率極高，今場係一場過定勝負，巴黎FC更加唔會亂嚟，半場和高唱入雲。
（周三凌晨2時45分開賽）
華曼吉杜卡易被嘜死
巴黎FC踏入季尾狀態不俗，近5戰獲3勝2和不敗佳績，不過巴黎火力相當一般，整季38場聯賽僅入36球，攻擊力係前10球隊中最弱一隊。歸根究柢，巴黎太依賴盛傳被巴塞隆拿、利物浦及些路迪睇中嘅19歲單箭頭華曼吉杜卡，此子今季入11球，佔球隊總入球逾3成，一旦被凍結，整隊巴黎即時死火。
論戰力，朗斯稍不及巴黎，今場作客之餘，更係一場定生死嘅淘汰賽，料不敢輕舉妄動，加上兩軍近5次交手，有4次於換邊前不分勝負，今場揀半場和最啱數。
串烏德勒支大格羅寧根讓球勝
另外兩場荷甲附加賽次回合賽事，兩場勝方會殺入決賽爭歐霸入場券。烏德勒支主場對荷華高斯，首回合烏軍領先2比0，荷華高斯傷兵多防守又曳，今仗仲要焗攻，大盤穩開。另一場，首回合落後1比2嘅維迪斯，回師主場迎戰格羅寧根，可惜維迪斯主力比路上場傷出影響大，格羅寧根有望頂到，揀讓球客勝。
