今晚賽事唔多，阿King一樣搵到好嘢，重心意甲獨腳戲拉素主場迎戰博洛尼亞；拉素仍然沉醉喺贏得意大利盃嘅喜悅，戰意鬆懈乃人之常情，今場讓唔起近排弗爆嘅博洛尼亞，讓球客勝乃不二之選。
（myTV Gold 301、now 638、有線654及614台周二凌晨2時30分直播）
拉素上周中意盃決賽末段連入兩粒，最終以2比0擊敗阿特蘭大，第7度捧盃兼取得下屆歐霸入場券，而佢哋已無緣爭奪歐聯入場券，可以話今季任務完成，餘下聯賽已成例行公事，依家眾將仍沉醉捧意盃喜悅中，匆匆再戰聯賽可能隨便應付，加上後衞史堤芬拉度坐波監，箭頭恩莫比尼連續8仗食白果，想贏亦有心無力。
相反，之前陷護級漩渦嘅博洛尼亞季尾大爆發，近10仗聯賽取得7勝1和2負，狂搶22分提早上岸，氣勢之盛唔講得笑，射手柯蘇連尼近4仗轟3粒，加上近2次作客拉素未輸過，今場仲有得受讓咁筍，讓球客勝有分頭咪錯過。
哥登堡追大盤
另外，瑞典超有場前列大戰哥登堡主場對哈馬比，兩隊依家同分兼近況都弗，不過哈馬比一向攻強守弱，近7仗有6場開3球或以上，捧入球大包冇衰。最後係亞冠盃D組最後一輪賽事，吉達艾阿里主場對柏克塔哥，吉達艾阿里射手奧馬艾蘇馬因傷未必出得，柏克塔哥只要今仗唔輸即出線，受讓有計。
