球季嚟到尾聲，各大聯賽爭冠形勢幾近塵埃落定，其中今晚西甲煞科日，巴塞已經蟬聯冠軍，皇馬亦係等放暑假格局，因此2仗都無博彩價值。
概括來講，西甲今季仍屬3雄鼎立局面，由巴塞、馬體會同皇馬壟斷頭3名，其餘17隊毫無競爭之力。不過3雄各有問題，皇馬失去C朗之後，前線欠缺1名穩定而高水準嘅數胡人物，無論係賓施馬、加里夫巴利等均屬海鮮波，表現時好時壞，何況主力陣容開始老化，2名主帥洛佩特吉及蘇拿利都冇計，最終要搵施丹回巢收拾殘局，但此時歐聯已出局、聯賽大落後，施丹只能放眼下季，預計在會長皮里茲放權下，佢會進行大換血。
巴塞要搵定美斯接班人
無可否認，馬體會在施蒙尼麾下重拾勁旅本色，不過其注重穩守突擊嘅打法已達樽頸位，令戰績未能更進一步，陣中亦出現人心思變。王牌基沙文、中堅高甸及左閘盧卡斯靴南迪斯相繼宣布離隊，沙奧尼古斯、菲臘路爾斯、桑法蘭托里斯亦可能步佢哋後塵，「床單兵團」面臨拆骨，施蒙尼嘅重建任務更為艱巨。
巴塞看似冇乜問題，因為隊長美斯今季經常以一己之力解決問題，不過從歐聯4強被利物浦反勝4比3中，睇得出美斯都唔係萬能，畢竟呢位球王年紀唔輕，如何做好接班準備，會係「地上最強」重要課題。
金句
西甲煞科日賽事平凡，巴塞皇馬無博彩價值。
黃興桂
