常規賽冠軍 季後賽輸經驗
澳職季後賽周日下午上演王者之戰，常規賽冠軍珀斯光輝主場鬥2哥FC悉尼。光輝上場面對阿德萊德聯喺大好形勢下差少少甩轆，季後賽經驗明顯不足；相反悉尼大破墨爾本勝利霸氣重現，加上近期對賽往績佔盡上風，悉尼受讓肯定捧讓球客勝。
（myTV Gold 302、Now 639、有線615及655台周日下午4時30分直播）
光輝早前以8分拋離悉尼首奪常規賽錦標，仲係今季入波最多、失波最少嘅球隊，奪冠實至名歸。不過今屆只係光輝近8屆第2度殺入季後賽決賽，比起近5屆3次殺入總決賽嘅悉尼，光輝經驗明顯較輸蝕。上仗光輝喺4強迎戰今季常規賽入球第2少嘅阿德萊德聯，竟然係領先2球下，臨完場前9分鐘連失2球，被迫踢加時，然後加時再喺先入球情況下，又被阿聯追和，最終要搞到互射12碼先贏波，足證常規賽牢不可破嘅光輝防線，去到季後賽已經唔再穩陣。
悉尼近10次對賽贏9次
悉尼4強大勝上屆季後賽盟主墨爾本勝利6比1晉級，仲報埋上屆4強畀勝利淘汰嘅一箭之仇，士氣同信心都返晒嚟。加上雙方近10次交鋒，悉尼豪取9勝1負，包括今季常規賽3次碰頭贏2次，呢場悉尼起碼可以喺法定時間之內保持不敗，讓球客勝唔好錯過。
