英足盃決戰 屈福特守得
英格蘭足總盃決賽，曼城今晚喺溫布萊球場迎戰屈福特，大家都關注曼城能否成為史無前例嘅本土三冠王，兼袋到1.5億港元獎金。雖然足總盃以往一直稱為爆冷嘅溫床，但此說法早已過時，觀乎過往20年，只有兩支非Big6球隊奪冠，屈福特今晚都係九死一生，不過佢哋嘅泊大巴戰術或者頂得住半場，不妨先買個1球、球半半場入球細。
（無綫85台及myTV Gold 306周日凌晨零時直播）
曼城今季已先後奪得聯賽及聯賽盃，雖然歐聯功虧一簣，但已係相當了不起嘅成就，事實上曼城整季嘅演出相當平穩，全季4項賽事加埋亦只係輸過6場，可以話完全冇出現過低潮，甚至比起20年前曼聯三冠王勝率更高，相信冇人會懷疑藍月亮奪得三冠嘅能力，問題係今場盤口讓到球半、兩球，讓球主客和亦去到-2，一場決賽要贏三球先贏晒個盤，值博率真係唔高，惟有向其他盤口落手。
睇番曼城近期嘅表現，雖然能踢出連勝嘅氣勢，但過程全不輕鬆，近9仗有4仗半場係0比0，3場係僅小勝1比0，可見曼城面對對手嘅密集，都要花一段時間才能拆解，屈福特自知技不如人，今場亦肯定防守行先，喺決賽嘅謹慎氣氛下，半場冇乜波入相當正常。
西領隊對決40分鐘後至入到波
屈福特創會121年以來，都未拎過任何重要賽事錦標，最叻仔都係84年取得足總盃亞軍，球員嘅飢渴感同決心肯定夠，不過佢哋今季對BIG6勁旅嘅成績實在不敢恭維，已連輸11場，幸好半場表現尚算理想，13次對賽之中，有10場開到半場細，可見屈福特上半場策略都係相當保守，但求唔失波下半場再搏命。
事實上，屈福特領隊查維加西亞對曼城領隊哥迪奧拿有相當程度了解，兩人都來自西班牙，球員時代都係踢中場，可以話同期出道，但當然哥迪奧拿無論喺球員時代或領隊時代嘅成就都較查維加西亞優勝，兩人至今交手兩次，都係哥迪奧拿獲勝，不過首個入球都係出現喺40分鐘後，相信今場戰情都會類似。
