懶理拜仁多蒙特爭冠軍
德甲今晚煞科，拜仁同多蒙特爭霸鬥到尾，《東網》直播雙響炮會同時播晒兩隊比賽，《球愛Live Party》陪大家睇拜仁慕尼黑主場對法蘭克福嘅焦點戰，同時安排慕遜加柏主場對多蒙特嘅另一頻道英語旁述，大家唔會錯過捧盃場面。不過拜仁同多蒙特今晚係咪可以輕鬆取勝都有疑問，皆因佢哋嘅對手法蘭克福同慕遜加柏，都力爭緊第4名下屆歐聯參賽資格，攞唔攞到呢個位，關乎3,000萬歐元（約2.6億港元）嘅獎金同轉播收入，一定去盡打大佬搶錢，預期係連場對攻好戲，黑柴兩場都推介中位數3.5球大盤。（on.cc東網周六晚9時30分分途直播）
法蘭克福出番晒三叉戟
拜仁目前領先多蒙特兩分，仲有17個得失球差優勢，今晚只要賽和法蘭克福，就可以確保德甲7連霸，雖然賽前德國傳媒瘋傳，即使拜仁最終贏得德甲同德國盃雙料冠軍，教練尼高高華都會被炒，來自荷甲燕豪芬嘅雲邦美、同阿積士嘅藤希治係繼任熱門，不過尼高高華嘅回應處之泰然，佢話依家唯一要做嘅就係幫拜仁攞冠軍，亦幫自己攞第一個執教生涯嘅重要錦標，自己嘅生活方式根本唔需要巨額薪酬，攞完冠軍留唔留任都唔係大問題，睇嚟消息對佢哋士氣冇乜影響，事實上拜仁上輪作客勁敵萊比錫全場強攻佔盡上風，季尾狀態相當對辦。
法蘭克福上輪輸咗畀緬恩斯，主要原因係歐霸同車路士火併到互射12碼未回到氣，但今晚冇壓力下打老虎係另一回事，若然佢哋爆冷贏波，而慕遜加柏同利華古遜都贏唔到，佢哋就可以搶番第4名嘅歐聯參賽資格，今晚冇理由唔去盡，法福上季德國盃決賽都贏過拜仁，今晚當然相信可以重溫好夢，主力箭頭施巴斯坦賀拿傷愈復任正選，終於可以同盧卡祖域、列比錫重組三叉戟，佢3個今季德甲合共轟入咗40球，拜仁缺少咗紐亞嘅防線幾難力保不失。
多蒙特馬高列奧斯復出
至於同時舉行嘅慕遜加柏主場對多蒙特，慕遜加柏同法蘭克福一樣，正為歐聯入場券同豐厚轉播收入搏命，亦係執教球隊兩年半嘅教練赫基告別戰，佢講明要主場贏波攞Happy Ending，遇上有王牌球星馬高列奧斯停賽期滿復出，喺爭霸路誓同拜仁戰鬥到底嘅多蒙特，注定又係一場入球騷。
