日職、日乙周六有多場比賽上演，頭場直播戲碼有日職北海道札幌岡薩多主場迎戰大阪飛腳。岡薩多自從首席射手安達臣盧比斯受傷後表現下滑，相反飛腳今季遇強愈強，上周末喺打吡戰贏波士氣高昂，飛腳受讓捧得過。
（有線602及662台周六下午1時直播）
岡薩多今季有上季首席射手都倉賢離隊，搵咗巴西鋒將安達臣盧比斯及土炮鈴木武藏填補空缺，點知安達臣盧比斯喺上月尾作客磐田山葉一役傷出，已經返咗老家巴西養傷，嚴重打亂岡薩多部署，冇咗呢位喺聯賽入咗7球嘅射手，岡薩多聯賽連盃賽已4場不勝，當中3場食白果，影響有幾大可想而知。
日乙FC橫濱作客唔赦風林
飛腳上周末聯賽喺大阪打吡戰以1比0力挫櫻花，信心同狀態回升，而且佢哋今季聯賽鬥現時排名前4球隊，只喺季初輸過畀名古屋鯨魚，其餘鬥FC東京、大分三神及川崎前鋒都唔使輸，趁岡薩多缺少主力射手有望偷雞，捧讓球客勝。
另一場直播賽事有日乙甲府風林主場鬥FC橫濱。甲府風林自從被水戶蜀葵打破聯賽不敗身後，近5場聯賽僅得2勝，聯賽榜亦跌落第4位；FC橫濱近4場作客僅一負，而且上季主、客兩循環交鋒皆順利贏波，今場捧FC橫濱讓球客勝。
（有線603及604台周六下午3時直播）
