周日早上美職焦點戰，新英倫革命恭候華盛頓聯隊。華盛頓聯隊有朗尼做重心，成績一路向好，不過，今場朗尼嘅前線拍檔保羅阿利奧拿要停賽，朗尼頓成眾矢之的，被緊貼防守下，威力將會大減，今場寧揀中位數2.5球嘅入球細。
（myTV Gold 302、Now 639、有線655及615台周日早上7時30分直播）
華盛頓自去季季中獲朗尼加盟後，由護級球隊變成季後賽分子，可見朗尼嘅重要性。今季華盛頓聯隊戰術繼續以呢位前曼聯名將為重心，朗尼開季至今已入7球，佔球隊總入球數近4成。
革命穩陣行先
不過列強似乎已經洞悉華盛頓聯隊嘅踢法，對朗尼作出針對性凍結，近7場聯賽朗尼只入3球，球隊亦只得3勝1和3負，當中5次開入球細，今場朗尼拍檔保羅阿利奧拿仲停埋賽，料華盛頓更加唔敢輕舉妄動。
革命早前表現飄忽，既能以4比4賽和肯薩斯體育會、又卻以1比6及0比5不敵費城聯及芝加哥火燄，到5月中終一改作風，唔再亂咁向前衝，上場作客亦能以0比0賽和蒙特利爾衝擊，取得不俗成果，料今場亦會以穩陣行先，相信入波唔會多。
