3冠王3連霸只差一步
蘇格蘭足總盃今晚喺格拉斯哥咸普頓公園球場上演決賽，力爭「3冠王3連霸」嘅些路迪撲擊赫斯。雙方近15次交鋒，些路迪贏咗13次，包括上周末喺聯賽煞科戰贏波，相隔僅一星期，睇唔出赫斯有咩本錢可以創造奇迹，些路迪讓一球/球半照捧上盤。
（周六晚10時開賽）
赫斯近況曳爆
些路迪對上2季先後囊括國內三大錦標（蘇超、蘇聯盃及蘇足盃），今季贏完蘇聯盃後雖有領隊羅渣士轉投李斯特城，不過喺名宿連儂接手後保持強勢，最終以9分拋離宿敵格拉斯哥流浪完成聯賽8連霸偉業，只要贏埋今場便可連續3季成為「3冠王」，決心唔需要懷疑。雙方上周末喺聯賽煞科戰碰頭，些路迪憑米高莊士東梅開二度以2比1擊敗對手，連同今仗在內，些路迪近15次對賽贏足13次，往績一面倒。
赫斯近5場聯賽1和4負，狀態麻麻，而且佢哋今屆蘇足盃晉級之路從未遇過蘇超球隊，打入決賽似乎冇咩說服力。些路迪對上4次打入蘇足盃決賽全部都能喺法定時間內贏波捧盃，當中3次淨勝2球或以上，今場讓一球/球半冇有怕，上盤照捧。
