英甲升班附加賽決賽查爾頓火併新特蘭，兩軍於溫布萊球場爭奪英冠席位。查爾頓陣中最出名，一定係領隊保耶，呢名前列斯聯「壞孩子」，舊年3月以看守領隊身份接掌帥印，今季全面接手後成績穩步上揚，加上球隊同標準列治為兄弟球會，球員表現好嘅，隨時有機會轉去比甲，甚至亮相歐洲賽，係搵大錢好機會，所以球員今場一定搏命，平手盤值捧。
（周日晚10時開賽，馬會網上文字直播）
查爾頓老細德赫列特2014年成攻收購呢間倫敦球會，呢名比利時富翁同時擁有比甲標準列治、西乙艾干高同德丙卡爾斯耶拿，德赫列特將查爾頓作為標準列治嘅衛星球會，以查爾頓作為青訓基地，或者練兵嘅地方，只要球員有表現，或者應該理解為有商業價值，就會轉投標準列治，呢啲球員之後或會被兜售，情況就似當年巴舒亞伊，喺標準列治被賣走。球會透過買賣賺錢，球員身價同薪金亦水漲船高，算係雙贏局面。
聯合國兵團博表現有錢途
大家不難發現，查爾頓同其他英甲球會好唔同，大部分英甲都係以英格蘭球員為主，但查爾頓係「聯合國球隊」，好似升班附加賽準決賽正選陣容當中，有7個不同國籍球員擔任正選，包括英格蘭、愛爾蘭、比利時、荷蘭、波蘭、德國同法國，佢哋只要有好表現，錢途肯定無可限量。
查爾頓領隊保耶對於管理呢班球員甚有心得，以往球員時代嘅「壞孩子」肯定知道球員最想要啲乜嘢，據知查爾頓更衣室氣氛非常良好，佢今場要跟同樣係42歲嘅新特蘭少帥積克羅斯拗手瓜，查爾頓由2月9號開始，到上仗附加賽準決賽次回合，近17戰只輸過2場，今場開平手盤，絕對值得捧場。
