意甲煞科日
今晚意甲煞科日，焦點落喺前4之爭，阿特蘭大、國際米蘭、AC米蘭及羅馬去爭逐餘下2張下屆歐聯入場券，彼此之間只差3分，為名為利一定爭崩頭，未鬥到最後一刻，都唔知入場券花落誰家。
贏波即首度躋身歐聯 阿特蘭大半場夠薩
意甲前4之爭關鍵戰，由「3哥」阿特蘭大硬撼薩斯索羅。早前失落意盃嘅阿特蘭大，今仗贏波即可首度躋身歐聯，掌握主動權，加上近年交手佔盡上風，經常玩速戰速決，半場主勝有買趁早。
（周一凌晨2時30分開賽）
依家除咗冠、亞軍祖雲達斯及拿玻里穩奪來屆歐聯資格，排名第3位至6位嘅阿特蘭大、國際米蘭、AC米蘭及羅馬，仲有機會趕上歐聯尾班車。阿特蘭大與國米同得66分，外號「女神」嘅佢哋，目前 因為對賽成績較佳排第3，由於兩軍領先第5名嘅AC米蘭1分，阿特蘭大今場只要贏波，就唔使理其他球隊嘅賽果，肯定以季軍過終點。雖然阿特蘭大於早前意盃決賽輸畀拉素，屈居亞軍，好彩佢哋未有洩氣，上場聯賽作客1比1賽和祖雲達斯，近12場聯賽8勝4和，強勢為首度參與歐聯全力衝刺。
薩斯索羅近3對賽都早輸
至於排第10嘅薩斯索羅，依家大踢風流波，近7仗聯賽贏得1場咁大把，何況有比路素、麥拿尼、史提芬奴辛斯因傷倦勤，戰意、實力都難與阿特蘭大相提並論。計晒聯賽同盃賽，阿特蘭大近3次對薩斯索羅贏晒之餘，全部都喺換邊前取得領先優勢，可見佢哋每次碰頭都鍾意先發制人，主勝太熱冇肉食，轉捧半場主勝更好路。
文：法達斯維
主隊爭前4客軍博上岸 國米安玻里大格鬥
4哥國際米蘭今晚主場迎戰安玻里。國米上場以1比4不敵拿玻里，錯失鎖定前3機會，不過佢哋今場只要贏波一樣可以攞到歐聯資格，主場出擊唔會手軟；安玻里仲未肯定上岸，為護級亦唔能夠坐以待斃，中位數開3/3.5球照捧大。
（myTV Gold 301、Now 638、有線614及654台周一凌晨2時30分直播）
國米上場原本只要擊敗拿玻里便可獲得歐聯入場券，可惜佢哋最終大敗1比4，不但被阿特蘭大以較佳對賽成績趕過跌落第4，更被宿敵AC追至剩得1分差距，一旦國米今場失分而AC贏波的話，國米便會被踢出前4，所以今場絕對唔可以放軟手腳。
安玻里為護級季尾大爆發，聯賽累積3連勝，現以1分領先尾3嘅熱拿亞，今場贏波就肯定上岸，不過萬一失分，同時熱拿亞擊敗費倫天拿的話，安玻里就會宣告護級失敗，形勢上同國米一樣未可安寢，今場一旦出現入波勢必演變成入球騷，大盤好路。
文：笛子波童
羅馬迎帕爾馬追半和
排第6嘅羅馬會於主場迎戰帕爾馬，羅馬暫以3分落後阿特蘭大及國際米蘭，同時比第5的AC少2分，理論上仍有機會躋身前4，不過先決條件係做好本份全取3分，但個主W只得1.12倍，讓球主客和「-2」又有啲辣，倒不如扒吓冷玩半場和。
帕爾馬上場主場以1比0擊敗費倫天拿，37戰得41分宣布護級成功，全賴季尾增強防守性部署，佢哋近7場聯賽有6場換邊前保持不失球，撞正羅馬近期主場表現亦較慢熱，近5場聯賽主場有4次與對手半場未分勝負，2.4倍半場和博得過。
（周一凌晨2時30分開賽）
文：臻贏特
AC啞火鬥史帕爾獻細
AC米蘭作客史帕爾，AC暫以1分落後國米，由於對賽成績輸蝕，AC今場必須贏波，然後寄望國米失分才有機會入前4，不過AC最近1次單場入3球已經係2月尾嘅事，近7場入波全部1球起2球止，6次總入球開2球或以下，前線缺乏強攻本錢。史帕爾近5場聯賽主場只曾不敵拿玻里，其餘4場先後擊敗拉素、羅馬及祖記，踢得有板有眼，相信AC都唔敢亂嚟，只敢穩中求勝，加上以AC疲弱鋒力，今場難有大量入球，中位數2.5/3球必捧細盤。
（myTV Gold 302、Now 639、有線655及615台周一凌晨2時30分直播）
