美國靠小韋亞火力不足
波蘭舉行嘅世青盃，今晚進行次輪分組賽，其中D組嘅美國U20火併尼日利亞U20。美國首仗出閘脫腳，今仗不容再失，問題係前線僅得將門之後嘅添莫菲韋亞較標青，初段未必咬得入守得兩嘴嘅「小超霸鷹」，半場和值得捧場。
（周二凌晨2時30分開賽）
美國U20今屆陣容唔算曳，好多小將都外流歐洲，包括喺德國嘅巴迪史葛、基斯李察士、阿歷士文迪斯等，但講到名氣最大，梗係1995年世界足球先生韋亞嘅囝囝添莫菲韋亞。效力巴黎聖日耳門嘅添莫菲韋亞，喺呢季季中被外借到些路迪，獲得更多上陣機會，半季入咗3粒算唔錯，美國U20亦靠佢孭飛，喺今屆世青盃首輪對烏克蘭U20更交出助攻，可惜落筆打三更輸1比2，佢都獨力難支，想出線今仗不容有失。
另一邊廂，有曼城中場巴舒里奧助陣嘅尼日利亞U20，分組賽首輪以4比0輕取卡塔爾U20，但對手太弱未受考驗，而且佢哋一向守強攻弱，喺年頭5場U20非國盃賽事，法定時間僅得2勝3和，只入4粒兼全開半場和，最終「梗頸四」衝線，今仗和波冇壞，勢必穩陣行先，半場和不妨追多鋪。
烏拉圭贏即出線信得過
較早時間開波嘅C組賽事，洪都拉斯U20面對烏拉圭U20，前者首輪對住新西蘭U20竟慘吞5蛋，肉酸到暈，相反烏拉圭則贏挪威U20，呢支南美勁旅已連續7屆出戰世青盃決賽周，其中近3屆更兩度殺入4強，今仗再贏即出線，直取讓球客勝。
（周二凌晨零時開賽）
