17億爭奪戰 泰利林伯內訌
今晚喺「球壇聖殿」溫布萊球場上演嘅英冠附加賽決賽，由阿士東維拉硬撼「綿羊」打比郡，稱得上係「車仔同學會」。大家最熟嘅梗係維拉助教泰利，以及打比郡領隊林柏特，同屬車路士傳奇球星，深受鐵血防守影響，喺關乎價值1.7億鎊（約17億港元）嘅衝超之戰，一定穩字當頭，況且近年英冠附決賽例少交收，2.5球嘅入球細要趁早買。（周一晚10時開賽，馬會網上文字直播）
維拉助教泰利與打比郡主帥林柏特分屬老友，以往係車仔稱霸英超時期嘅正副隊長兼核心，兩人都係「寸王」主帥摩連奴嘅得意門生，深明鐵血防守堅係重要，亦影響埋佢哋執教風格。由於係1場過分勝負嘅決賽，稍有閃失隨時冇得升上英超，特別係維拉上年先喺英冠附加賽決賽輸畀富咸，肯定體會甚深，今場唔想重蹈覆轍。查實維拉主帥甸史密夫都幾注重防守，連埋英冠附4強在內，佢哋喺近6仗只失5球，當中4仗開2球或以下；至於打比郡喺「林伯」麾下近6仗失5粒，同樣有4次開2球或以下，守得兩嘴。
近6屆決賽全開兩球或以下
翻查紀錄，近6屆英冠附加賽決賽，法定時間內合共只入得5粒咁大把，全部開2球或以下。始終決賽關乎升班資格，一旦升上英超後，球會未來3年至少獲約17億港元收入，球員亦可以喺更高水平嘅英超比賽，踢得好甚至可博跳槽，若果今仗一時唔小心，則由只差一步變為一步之遙，為名為利，梗係唔敢輕舉妄動，2.5球嘅細盤乃不二之選。
