新人輩出勢劏阿根廷
周三凌晨世青盃分組賽，F組葡萄牙U20硬撼阿根廷U20。葡萄牙今屆陣容人才濟濟，小組首戰亦成功擊敗南韓，呢場面對後防唔算穩陣嘅阿根廷，一班攻擊好手隨時再有機會發圍，平手盤捧葡萄牙U20。
（有線601及661台周三凌晨零時直播）
葡萄牙U20今屆以賓菲加、波圖和士砵亭等國內豪門嘅年青球員為骨幹，雖然最為人熟悉嘅「新C朗」祖奧菲歷斯，已經被提拔做大國腳無緣今屆賽事，不過佢啲隊友來頭絕對唔嘢少。其中謝特臣費南迪斯今屆喺賓菲加上位擔正，帶領球隊聯賽封王兼喺歐霸盃殺入8強，絕對係葡萄牙U20中場核心，加上分別效力狼隊同曼聯嘅維拿基同達洛治都已經喺英超嶄露頭角，整體質素有保證。相反千禧年前後多次稱霸世青盃嘅阿根廷，近幾屆世青盃表現明顯下滑，首戰面對弱旅南非U20雖然大勝而回，不過後防風聲鶴唳唔算穩陣，先後2次遭對手偷襲得手，呢場面對超班嘅葡萄牙U20隨時陷入苦戰，平手盤寧願捧葡萄牙U20好過。
南韓法國可分途報捷
同組南非U20對南韓U20，南非U20首戰慘敗，仲有入波嘅守將基南菲臘斯攞紅牌呢場要坐波監，對住有華倫西亞小將李康仁領軍嘅南韓U20，隨時再輸，吼客勝。另外E組有巴拿馬U20鬥奪標大熱法國U20，後者首戰靠里昂新仔高爾尼大爆發，以2比0輕鬆擊敗沙特阿拉伯U20，呢場面對同屬魚腩部隊嘅巴拿馬U20，一班「高盧鷄」新星熱好身有望乘勢追擊大炒對手，讓球客勝值博。
