和波攞1分即首名出線
喺波蘭舉行嘅世青盃已打緊分組賽尾輪，今晚直播戲碼就有C組嘅新西蘭U20硬撼烏拉圭U20。兩隊同得6分肯定出線，今仗只屬名次之爭，烏拉圭係世青盃常客，既已晉級隨時留力，新西蘭今屆一鳴驚人，為保持不失實玩死守博首名出線，入球細更值得捧場。
（有線661及601台周五凌晨零時直播）
雙方同樣於C組頭兩輪分組賽贏晒，各得6分肯定出線，新西蘭憑較佳得失球暫居榜首。老實講，烏拉圭實力點都秤先啲，但呢支喺近3屆世青盃兩入4強嘅南美勁旅，已經熟晒此盃賽嘅玩法，依家又未知首名或次名出線後會對乜嘢對手，與其今仗搏甩髀，倒不如留力16強好過，今仗或出副選交差。
新西蘭今屆異軍突起，首仗狂數洪都拉斯5粒，上仗又贏挪威兩球，表現令人刮目相看，心雄之下想爭首名出線威威唔奇。值得一提嘅，係新軍在頭兩輪保持零失球，守得兩嘴，面對勁敵烏拉圭，一定唔敢輕舉妄動，隨時擺鐵桶陣玩死守，似乎細盤更可取。
美國求晉級炒起卡塔爾
至於D組嘅美國U20對卡塔爾U20，首仗落筆打三更嘅「花旗國」，上仗靠前鋒施巴斯坦蘇圖省兩粒，贏尼日利亞2比0打開勝利之門，今仗面對同組最弱、頭兩場輸晒兼冇波入嘅卡塔爾，有力大勝爭出線，直取讓球主勝。（周五凌晨2時30分開賽）
