博炒沙利Vs歐霸王艾美利
今晚喺阿塞拜疆上演歐霸盃王者之戰，由英超倫敦雙雄車路士與阿仙奴爭逐冠軍。車仔雖有歐霸盃射手榜「1哥」基奧特倒戈舊東家，但傷兵成籮，領隊沙利又博炒影響軍心，相反阿仙奴為搶下屆歐聯入場券，戰意更堅，主帥艾美利若果今次再贏，就會榮膺「歐霸盃之王」，加上近年交手甚少於法定時間輸波，阿仙奴仲有得受讓咁筍，讓球客勝咪錯過。
（myTV Gold 303、Now 643、有線656及616台周四凌晨3時直播）
車仔曾喺2013年捧過歐霸盃，今屆又大部分時間派副選出戰，但14場法定時間內仍取得11勝3和不敗佳績，箭頭基奧特更以10球位居射手榜榜首。睇落車仔順風順水，但查實其晉級路途上，除咗4強對手法蘭克福稍強外，其餘皆為歐洲二線球隊，而對法福兩回合法定時間都打和，要靠互射12碼先殺入決賽，呢個表面睇嘅「靚績」信唔過。
車路士陣容天殘地缺
除此之外，新星赫臣奧杜爾及羅夫度斯卓克提早收咧、守將魯迪格亦有傷在身，陣容可謂天殘地缺。最衰係領隊沙利火上加油，有指佢同祖雲達斯達成協議，下季會轉教呢支意甲班霸，但因佢同車仔仍有合約在身，近日批評球隊以今場捧盃與否定其去留，嬲到想劈炮唔撈，似係博炒，令軍心不穩。
連續2屆無緣歐聯嘅阿仙奴，今季聯賽只獲第5位，若果想取得下屆歐聯入場券，唯一辦法係捧歐霸盃。好彩主帥艾美利一向有歐霸盃專家美譽，與車仔相比，佢哋今屆於淘汰賽踢拿玻里、華倫西亞等勁旅出局，更有說服力，而且艾帥在2013至16年執教西維爾期間，連續3屆領軍入決賽兼捧盃堅勁，如果今次再封王，佢就會力壓意大利白頭佬查帕東尼，成為捧走歐霸盃（連同前身歐洲足協盃）次數最多領隊，真係可以改名做「艾美利盃」。
阿仙奴近8對賽僅1敗
今場係老門神施治掛靴前最後一戰，而中場米希達利恩受政治因素影響未能披甲，必定激起眾將為兩人而戰嘅鬥心，射手奧巴美揚於今季各項賽事有30球進帳，包括喺歐霸盃轟8球，夥拍拿卡錫迪不容小覷。再睇睇雙方近8次正面交鋒，阿仙奴喺法定時間取得2勝5和僅1敗，仲獲受讓首選讓球客勝，不妨捧埋佢哋有2.1倍嘅「冠軍」。
