雙英會師馬德里爭做歐洲1哥
萬眾期待嘅歐聯決賽今晚於馬德里上演，由連續兩年殺入決賽嘅5屆冠軍利物浦，迎戰決賽初哥熱刺。「紅軍」吸收過上屆飲恨教訓，加上早前成為「英超史上最強亞軍」，球員嗰種深深不忿及對捧盃嘅渴望，絕對成為最大推動力，利物浦讓半一，樂比睇好上盤！
（無綫myTV Gold 303、Now 643、有線656及616台周日凌晨3時直播）
利物浦領隊高普執教生涯雖然多次同獎盃無緣，畀球迷嘲笑係「二奶領隊」，但公道講句，佢都贏過德甲及德國盃冠軍，上屆亦帶領「紅軍」戰至最後階段，論大賽成績同經驗，贏執教生涯未獲任何大賽錦標嘅熱刺主帥普捷天奴幾條街。再者高普係位民望甚高，心理質素極佳嘅領袖，最擅長團結及激發球員鬥志，當利物浦4強首回合不敵巴塞0比3時，冇人估到佢哋次回合可以反勝4比0，證明「紅軍」就好似彈弓咁，拉得愈緊，反彈得愈勁。
高普經驗贏普帥幾條街
點解樂比成日執着於球隊及領隊嘅歷史往績，因為一場過嘅決賽，一瞬間決定同細節處理絕對主宰生死，呢種功力係需要經驗累積。就算普捷天奴能力幾咁高，決賽經驗始終有限，加上熱刺離開主場成績令人失望，近11場非主場賽事輸咗9場，「抗逆」能力令人懷疑。
論牌面，利物浦擁有英超神射手穆罕默德沙拿及沙迪奧文尼，英格蘭球員先生華基爾雲迪積克，金手套艾利臣比加，加上今季聯賽「雙殺」熱刺，獲睇好合情合理，而且羅拔圖法明奴傷愈可重組「埃及文明」，配合兩閘安德魯羅拔臣及阿歷山大阿諾特嘅側擊，足以摧毁熱刺。
熱刺首席球員哈利卡尼亦都傷愈，反而令普捷天奴陷兩難局面，因為熱刺喺冇卡尼嘅多場重要戰役中，靠孫興民同盧卡斯莫拉打突擊更有威脅，若果普捷天奴執意搵卡尼擔正的話，只會令利物浦勝算更大。
