東瀛雙箭傷退蝕章
周二晚世青盃16強激戰連場，等阿King同大家講吓過關心水。其中日本U20將會同南韓U20上演東亞打吡，「小武士」多位前場主力上仗傷出提早離隊，嚴重影響日本攻力，相反南韓中場李康仁表現夠搶鏡，有力帶領球隊贏波過關，捧受讓嘅南韓U20讓球客勝。
（有線601及661台周二晚11時30分直播）
上屆世青盃南韓作為東道主，面對葡萄牙以1比3輸波16強止步，今屆捲土重來肯定希望取得突破，於是唔少球迷就將贏波希望寄托喺李康仁身上。呢為年僅18歲嘅天才中場，細細個就畀西甲豪門球隊華倫西亞相中，已經喺「蝙蝠軍團」青訓浸淫多年，今季仲多次被調上1隊獻技，絕對係對佢實力嘅肯定。上仗面對強敵阿根廷U20，李康仁就交出關鍵助攻，幫助南韓U20以2比1擊敗對手，嚟緊比賽嘅表現值得期待。
相反日本上仗硬撼意大利一戰，有田川亨介同齊藤光毅兩位主力攻擊手傷出，兩人仲已經提前離隊無緣餘下賽事，球隊攻力勢必大受打擊，預計今場面對球風硬朗嘅南韓難有作為，寧願捧番南韓U20讓球客勝好過。
法國U20可挫美軍
同時開波嘅仲有法國U20面對美國U20，貴為今屆奪標大熱，法國分組賽表現冇令人失望，3戰贏晒兼只失過2球，要應付實力一般嘅美國U20絕對綽綽有餘，一於捧主勝。而阿根廷U20將會同馬里U20爭奪另一個8強席位，馬里U20今屆入得又失得，明顯攻強守弱，今場就算面對強敵，阿根廷U20都應該會繼續鬥攻，吼實入球大實冇錯。
