尼馬官司纏身難專心
將會以東道主身份舉辦美洲國家盃嘅巴西，展開第一場熱身賽，於巴西利亞國家球場迎戰卡塔爾。森巴兵團首席球星尼馬，受涉嫌強姦案官司困擾，唔多唔少都會影響到表現，領隊迪迪或者唔會畀佢踢晒全場，況且近期巴西喺國際賽表現穩陣，甚少大炒對手，近6場5場開細，今場相信以輕舒腳頭建立默契為主，揀入球細。
（周四早上8時30分直播）
巴西今次點兵精銳盡出，尼馬、加比爾捷西斯等主力皆在陣，但相較於本月中開打的美洲盃，今場只屬熱身性質，況且尼馬受到強姦案困擾，巴西傳媒報道，森巴大軍正喺特雷索波利斯訓練基地備戰，但消息指一部警車日前出現喺訓練基地外，警方親自搵尼馬簽收傳票，成個過程為時約45分鐘。報道指尼馬周五將要親自去法庭就強姦指控作供，巴西喺周四會同卡塔爾踢熱身賽，周五就會飛去阿萊格里港備戰周日友賽洪都拉斯，賽程相當緊密，傳尼馬可能會申請將案件審訊延期。
由於皇馬小將雲尼斯奧斯祖利亞因傷未有入選，前鋒羅拔圖法明奴啱啱踢完歐聯決賽體力成疑，預計領隊迪迪今場會考察艾法美路等新兵為主。
卡塔爾慣穩陣至上
卡塔爾同日本一樣獲邀參加今屆美洲國家盃，亦唔想喺正式比賽前大敗一場，佢哋年初勇奪亞洲盃，踢法一向穩陣至上，當中鬥南韓、伊拉克、沙特阿拉伯入球皆1球起、2球止，今場硬撼巴西，勢必加強防守，入球細好路。
