前線升呢矢志爭冠
今晚喺葡萄牙續有歐國聯4強戰，由荷蘭火併英格蘭。由於兩軍都有啱啱打完歐聯決賽嘅球員，今仗未必夫添出擊，不過荷蘭喺今屆歐國聯全面升呢，英格蘭亦矢志爭冠，箭頭哈利卡尼更請纓擔正，為爭入決賽勢必駁火，2.5球嘅入球大不容錯過。
（香港開電視77台、有線602及662台周五凌晨2時45分直播）
雲迪積克有得抖
荷蘭喺今屆歐國聯分組賽能力壓法國同德國晉級，表現令人眼前一亮，尤其係阿積士孖寶法蘭基迪莊同馬菲斯迪歷特，經過今屆歐聯洗禮後，表現愈來愈好，前者已畀巴塞簽入，馬菲斯迪歷特亦受多間豪門垂青，連同喺里昂翻生嘅前曼聯前鋒迪比，令荷蘭全面升呢。不過中堅華基爾雲迪積克同中場韋拿杜姆，喺日前先為利物浦踢完歐聯決賽，今場可能畀佢哋抖抖，對防守有一定影響。
哈利卡尼請纓擔正
相比之下，英格蘭有更多球員戰罷歐聯決賽，包括熱刺主力哈利卡尼、迪利阿里、艾歷迪亞、丹尼路斯，以及利物浦嘅祖高美斯、佐敦軒達臣及阿歷山大阿諾特，相信主帥修夫基冇可能畀佢哋全部休息，而喺決賽輸波兼冇料到嘅哈利卡尼，更自動請纓希望擔正，證明自己狀態冇問題，佢都好想為「三獅兵團」創歷史首奪歐國聯，彌補歐聯失冠嘅遺恨。
睇番英格蘭近2場對捷克及黑山轟10粒，史達寧及巴克里共入6球，連同多蒙特超新星查頓辛祖，有佢哋支援「哈神」唔愁入唔到波。但要留意，荷蘭反擊堅銳利，為爭入決賽隨時變鬥攻格局，何況「三獅兵團」近5場比賽全開3球或以上，捧2.5球嘅入球大更上算。
