女子世盃開鑼！！東道主睇定食
四年一度女子世盃香港時間周六凌晨開打，揭幕戰由A組東道主法國女足迎戰亞洲代表南韓女足。法國雖被視為今屆奪標大熱門，不過佢哋過去幾屆表現唔算突出，而且對上3屆東道主喺首場比賽都係贏1粒，所背負嘅主場壓力隨時影響發揮，「讓球主客和」主隊讓兩球太辣，波童建議捧中位數2.5/3球嘅入球細。
（香港開電視77台、有線603及604台周六凌晨3時直播）
法國男子隊去年贏得世盃冠軍威到盡，不過女子隊距離登頂似乎仲有一段距離，事關法國近4屆世盃3次參賽最佳成績只係11年入過4強，睇埋歐國盃成績，法國對上3屆都係8強止步，整體表現及成績同美國、德國等傳統強國根本冇得比。
對上7屆世盃主辦國從未試過喺分組賽出局，波童唔會懷疑法國出唔到線，不過能否場場大勝又係另一回事，始終主辦國因素有利有弊，一旦腳風唔順，壓力隨之而來，睇番對上3屆世盃主辦國喺首場分組賽都以1球差距險勝對手，強如德國喺2011年亦唔例外，法國要大炒恐有一定難度。
南韓復仇踢得更謹慎
南韓上屆16強正正就係輸畀法國被淘汰，吸取教訓相信今場會踢得更謹慎，而且上屆部分主力包括喺英超搵食嘅池笑然及趙昭賢仍在陣中，加上「人氣女球王」李玟娥近年喺日職愈踢愈好，唔係冇還擊之力。法國對上3次出戰世盃首戰取得2勝1負，2次贏波都係小勝1比0，相信今場入波都係1球起、2球止，波童推介入球細。
