麥巴比上陣成疑損鋒力
今晚繼續上演多場2020歐洲國家盃外圍賽激戰，其中H組榜首雙雄正面交鋒，土耳其主場硬撼法國。法國頭號前鋒基利安麥巴比有傷上陣成疑，對球隊進攻有好大影響，到訪向來喺歐國外戰績彪炳嘅土耳其，「高盧雞」冇乜本錢讓波，咪畀名氣呃到，捧讓球主勝好過。
（有線602及662台周日凌晨2時45分直播）
法國上年勇奪世盃，同主帥迪甘斯充分發揮麥巴比嘅速度優勢有好大關係。不過呢位「忍者龜」日前踢國際賽受傷，今場好大機會缺陣，冇咗麥巴比喺前場穿插做突破，「雙基」基沙文同基奧特必定畀對方後衞嘜到實，前場威力肯定插水，睇埋法國其他前鋒，京士利高文、泰奧雲同賓耶達把握力都麻麻，若然法國久攻不下，想變亦變唔到咩出樣。再者賽前證實防守中場尼高路簡迪舊患未好番，今仗肯定唔會落場，冇咗佢做搶截同串連，法國隨時畀人打開兩截都唔奇。
根尼斯回巢接手4戰全勝
曾帶領土耳其奪得世盃季軍嘅主帥根尼斯，今年回巢接手後4戰全勝，包括喺H組頭兩場贏晒，暫時同法國同分，只係因得失球差不及對手暫居次席，令人驚喜。土耳其陣中主將除效力愛華頓嘅前鋒辛克杜辛外，中場查漢奴古及辛基斯安達，過去一季喺AC米蘭同羅馬都有唔曳表現，實力有番咁上下。況且土耳其踢親歐國外特醒，近10場歐國外獲7勝3和不敗佳績，今仗更有主場之利，有晒條件搶分，讓球主勝不容錯過。
