今晚C組賽事德國作客白俄羅斯。雖然「日耳曼」主帥勒夫因傷未能督師，但一班後生仔排隊等上位，其中德甲銅靴獎「Kai仔」夏維斯有望落場，勢必爭取表現，但德軍後防不穩，客勝冇肉食，轉捧2.5球嘅大盤好過。
（有線603及604台周日凌晨2時45分直播）
「Kai仔」夏維斯潛力十足
德國主帥勒夫因健身時玩啞鈴整傷胸部送院，要休養1個月，今輪國際賽期由副帥索格領軍，反而係一班新仔爭上位好時機。其中過幾日先20歲嘅進攻中場夏維斯，亦可串演前鋒，今季喺利華古遜不斷換位都未受影響，聯賽轟17球獲銅靴獎，極具潛力，之前喺勒夫麾下甚少擔正，撞啱哥列斯卡有傷在身，今仗大條道理畀「Kai仔」顯身手。
德國喺小組首輪3比2險勝死敵荷蘭，後防不穩問題未解決，尤其門神紐亞無復當年勇，近7場僅得1次冇失波，相信索格會揚長避短，用進攻遮掩防線漏洞。事實上除夏維斯外，年輕翼鋒基拿比及利萊辛尼都係進攻好手，其中基拿比6次為國效命已入5粒，效率極高。德國近7場轟12球、6次開3球或以上，2.5球嘅大盤有買趁早。
