決意彌補主場失盃遺憾
周一凌晨歐國聯決賽一觸即發，主場出擊嘅葡萄牙將會同荷蘭爭冠軍。葡萄牙「超人」C朗上仗踢出漂亮一仗，幾乎以一己之力帶領球隊挺進決賽，面對後防表現未如理想嘅荷蘭，有力靠地利再發圍，葡萄牙讓平半上盤值博。
（香港開電視77台、有線602及662台周一凌晨2時45分直播）
葡萄牙對上一次喺本土舉行大賽要數到2004年歐國盃，當年喺費高同雷哥斯達等「黃金一代」領軍下，一路殺入決賽，其中對荷蘭嘅4強大戰中，為葡萄牙打開紀錄嘅，正正就係初出茅廬嘅C朗，可惜決賽葡萄牙被一致睇好下，最終不敵希臘同獎盃失諸交臂。
豬隊友換上好幫手
多年後，已經成為世界頂級球星嘅C朗，除咗已經帶領國家隊喺2016年捧起曾經失落嘅歐國盃，今次仲有機會彌補當年冇辦法喺主場球迷面前捧盃嘅遺憾。深受當地粉絲愛戴嘅C朗，每次掂波都引起全場轟動，上仗佢冇辜負大家嘅期望，個人連中三元為葡軍奏凱歌，狀態弗到冇朋友，此外，經常被指畀豬隊友拖累嘅C朗，呢場有貝拿度施華等前場好手幫波，葡萄牙贏面絕對高唱入雲。
連續錯過2016歐國盃同2018世界盃2屆大賽嘅荷蘭，跌落谷底後近期有回勇迹象，佢哋除咗有幫利物浦稱霸歐聯嘅華基爾雲迪積克，隊中效力荷甲班霸阿積士嘅法蘭基迪莊，亦喺歐聯大放異彩令人印象深刻，難怪「橙衣軍團」今屆歐國聯成功闖入決賽。不過相比之下，荷蘭整體實力略顯失色，4強戰32歲老將賴恩巴布就明顯冇料到，年輕中堅馬菲斯迪歷特仲出現低級錯誤累球隊失波，呢場荷蘭未必有力頂住葡萄牙攻勢，寧願捧番葡萄牙上盤好過。
