周三凌晨歐國外I組賽事，比利時主場迎戰蘇格蘭。「歐洲紅魔」王牌夏薩特狀態火熱，入波助攻瓣瓣有，福將奧歷治季尾都時來運到，搭住中場猛將奇雲迪布尼，呢場遇上「私房菜」蘇格蘭肯定冇甩拖，主勝賠率乏味，一於強捧讓球主勝。
（有線603及604台周三凌晨2時45分直播）
最近高調加盟皇家馬德里嘅比利時隊長夏薩特，上季為車路士喺各項賽事交出入19球、貢獻16次助攻嘅「雙雙」成績，絕對係車仔歐霸封王嘅功臣。「夏神」仲將好狀態帶埋去國家隊，頭3輪歐國外已經射入3球兼交出2次助攻，用實際表現向大家證明自己係比利時嘅絕對核心。雖然盧卡古同賓迪基一對箭頭狀態麻麻，好彩仲有奧歷治擔當奇兵角色，呢位利物浦前鋒季尾歐聯4強同決賽個人斬獲3球，加上傷愈復出嘅奇雲迪布尼，比利時整體實力靠得住。
近4次交手最少贏兩粒
況且蘇格蘭今屆歐國外開局就遇上亂流，首戰作客以0比3不敵哈薩克認真羞家，老帥麥利殊都因此被炒，改由奇勒接手。不過奇勒執教履歷一般，加上蘇格蘭大部分球員都只係嚟自蘇超同英格蘭低組別聯賽，質素有限，上場面對實力唔算標青嘅塞浦路斯，要到臨完場前先靠奧利華布基嘅入波僅勝2比1，表現欠缺說服力，呢場好難同球星雲集嘅比利時周旋。翻查往績，兩軍近4次交手，比利時全部都贏2球或以上，呢場「歐洲紅魔」有力靠主場之利大勝對手，讓球主勝值博。
