今晚G組榜首雙雄交鋒，波蘭主場鬥以色列。雙方喺小組表現穩定，全因同樣擁有強力攻擊手，波蘭除拜仁射手羅拔利雲度夫斯基外，今年喺意甲踢到曉飛嘅比亞迪克亦充滿威脅。以色列近7戰只輸過1場，射手艾蘭沙維弗到震，近3仗入7粒，唔怕同主隊對攻，入球大要趁早買。
（有線605台周二凌晨2時45分直播）
兩國關係緊張唔衰得
波蘭小組3戰全勝，以色列亦2勝1和，兩軍爭出線當然打崩頭。球場外兩國近期亦關係緊張，以色列上月向波蘭提出交涉，要求歸還二戰大屠殺期間猶太人被沒收嘅財產，但波蘭堅稱呢個問題已經係過去式，兩國因此鬧僵。雖然足球不應涉及政治，但以色列少不免有種唔想被睇死嘅決心，肯定唔會束手就擒。佢哋喺小組3戰省8粒，當中最威水嘅係前鋒艾蘭沙維，呢位中超廣州富力射手包辦當中7球，現時係歐國外神射手，絕對有力同波蘭大鬥法。
波蘭除羅拔利雲度夫斯基外，另一箭頭比亞迪克更要留意，佢今季上半季為熱拿亞上陣19場入13球，冬季轉去AC米蘭後披甲18場射入9球，上周五波蘭對馬其頓久攻不下，就係靠佢後備上陣建奇功，今晚兩隊射手鬥功架，大盤必捧。
