至於早啲開波嘅歐國聯季軍戰，由瑞士硬撼英格蘭。正所謂「季軍波、開大多」，尤其見到英格蘭中堅史東斯上仗連番甩轆，就知佢哋條後防幾咁牙煙喇，而且大家都冇心理包袱，隨時對攻攞番個尾彩，2.5球嘅入球大有買趁早。
（香港開電視77台、有線662及602台周日晚9時直播）
史東斯甩轆玩火自殺
瑞士喺4強以1比3不敵「超人」C朗率領嘅葡萄牙，輸亦無話可說，英格蘭於4強對荷蘭激戰至加時輸1比3，中堅史東斯連番犯錯，3個失波都關佢事，其中第2粒堅肉酸，佢喺自己禁區頂控住個波，轉晒圈唔知想點，畀迪比上前逼搶即被篤甩個波，累隊友基爾獲加擺烏龍。賽後英格蘭主帥修夫基仲死撐，話後場帶波推進係其戰術基礎，需知道史東斯剛季喺曼城已失去正選，「修哥」仲搵佢踢呢種高章波，猶如玩火自殺，面對同樣衝得又爛打嘅瑞士翼鋒梳頓沙基利，更易導致失波。
查實兩軍近期都好攻得，瑞士近4仗轟11粒，英格蘭近6仗於法定時間內亦入19球，非常進取。而且每逢大賽季軍戰，因為已失落爭標機會，通常班人會放鬆心情出戰呢場例行公事，容易造就入球騷，一於捧2.5球嘅大盤。
