今晚B組上演榜首對決，德國女足火併西班牙女足。兩支歐洲代表首輪皆全取3分，但論大賽經驗及個人質素，德國始終比西班牙稍勝一籌，相信經過首場後，德國愈踢愈入局會有較佳發揮，讓半一上盤值得支持。（周四凌晨零時開賽）
兩屆世盃得主德國上屆僅獲殿軍，今屆捲土重來決心十足。德軍首仗後防出現唔少甩漏，不過仍憑19歲新星姬雲一箭定江山，小勝「鏗鏘玫瑰」中國全取3分，再次印證佢哋係大賽球隊。西班牙首場對南非喺先失1球下，下半場中段連入兩個12碼，加上把握對手末段少踢1人錦上添花，成功反勝3比1，贏波過程比德國精彩，不過南非係今屆世盃4支新丁之一，實力難登大雅之堂，千祈唔好過分高估西班牙。
西班牙對歐洲球隊麻麻
睇番西班牙最近3次國際賽鬥歐洲球隊只得1勝2負，相反德國對上1次輸畀歐洲球隊已經係去年3月，近9場比賽共取得8勝1和佳績，歐洲「1姐」當之無愧。德國對上7次出戰世盃有6次取得小組首名，經驗贏西班牙成條街，德國讓半一波童力捧上盤。
