今晚女子世盃烽煙四起，尾場A組好戲碼，東道主法國女足火併挪威女足。兩軍首輪同樣大勝而回，盡顯強大火力，其中法國女足隊長艾美迪亨莉上仗開齋兼交出助攻，演出非常Sharp醒，不過主勝得1.29倍略嫌冇肉食，中位數2.5/3球嘅大盤有1.8倍相對抵玩得多。（周四凌晨3時開賽）
身為東道主，法國女足首輪果然先聲奪人，以4比0大勝有「女神」李玟娥助陣嘅南韓女足。法國隊長艾美迪亨莉先助攻畀娜森瑪打開紀錄，自己臨尾接應投桃報李嘅娜森瑪妙傳埋齋，呢位剛季協助里昂女足勇奪歐聯嘅中場，一傳一射勁有隊長風範。除此之外，司職中堅的蕾娜特喺嗰場更梅開二度，足證喺主場龐大球迷支持下，法國女足希望用進攻足球回饋鄉親父老，贏波之餘更要踢得漂亮。由於小組首、次名均可出線16強，現時手執3分嘅法國女足，今仗再贏的話就好大機會提早晉級，必藉地利之助繼續狂攻對手。
挪威對歐洲兵例演大騷
挪威女足雖有應屆女子金球獎得主希格貝芝避戰，但首輪仍以3比0大勝非洲代表尼日利亞女足，暫時因得失球唔及法國女足屈居小組第2，出線形勢都叫唔錯。查實挪威女足可以話係世盃常客，過去從未缺席決賽周，對上7屆更有6次躋身淘汰賽階段，論經驗及實力似乎比法國女足更為優勝，唔怕同東道主鬥攻。何況挪威女足對親歐洲球隊，經常上演大騷，近6次對歐洲球隊轟15粒，全開3球或以上，2.5/3球嘅入球大更值得捧場。
