今晚喺法國舉行嘅女子世盃C組重頭戲，澳洲女足挑戰巴西女足。「袋鼠女」首輪大好形勢下輸波堅唔抵，為爭出線今仗不容再失；巴西女足上仗收起王牌瑪達照樣大勝，火力強勁，預計雙方會駁火，入球大值得捧場。
（有線604及603台周五凌晨零時直播）
澳洲女足首輪略佔上風，並有隊長姬爾開紀錄下，卻喺補時階段失守，畀意大利女足反勝2比1。澳洲為爭晉級今仗焗攻，但佢哋近3場勁失10粒，防線唔多穩陣。巴西女足首輪收起瑪達下，靠另一老將姬絲蒂安妮大演帽子戲法，3比0輕取牙買加，若果出埋瑪達火力必大為提升。雙方近4次交鋒全開3球或以上，捧大盤明智。
中國將帥不和捱「細」界
夜少少嘅B組賽事南非女足鬥中國女足。南非實力不濟，首輪輸畀西班牙1比3，連熱身賽在內近3場全敗。中國首輪僅負勁旅德國，防守唔失禮，不過嗰場主帥賈秀全收起主力王霜，下半場先換佢出來，賽後賈帥被問此事就話：「我唔需要某一位球星喺球隊，我需要團隊足球。」似乎暗示將帥不和，加上「鏗鏘玫瑰」向來守強攻弱，近8場世盃7次開2球或以下，細盤穩陣。
（周五凌晨3時開賽）
