今晚美洲國家盃頭場委內瑞拉喺A組硬撼秘魯。論實力秘魯可能略勝一籌，但衰在近況差兼埋門唔掂，前線仲要靠老人家法芬同荷西古里路打拼，想攻破委內瑞拉防線唔易，捧中位球2.5球細盤更上算。
（Now 650周日凌晨3時直播）
仍倚重法芬古里路等老將
秘魯近年表現重上正軌，唔單止近3屆美洲盃兩奪季軍，上年更事隔36年再殺入世盃決賽周，確實有賴法芬及古里路等人努力，不過兩老已經34及35歲，走下坡在所難免。新一代好似雷迪亞斯、安達卡里路等技術唔錯，但偏偏係臨門唔多掂，上年世盃分組賽對住丹麥同法國，場面不落下風，就係入唔到波。秘魯近7仗熱身賽只得2勝1和4負入得5粒，狀態明顯谷唔起。
委內瑞拉大部分球員都喺中北美洲或歐洲低水平聯賽效力，最具名氣係紐卡素箭頭荷西朗頓，衰在目標太大容易畀人嘜死。雖然過去22次碰頭秘魯贏咗16次，不過委內瑞拉啱啱喺熱身賽擊敗美國，士氣大振，有力頂住唔會大敗。何況秘魯近9場美洲盃分組賽，7次開2球或以下，2.5球嘅細盤最穩陣。
