出線冇阻力唔使急搏拳
美洲國家盃聽朝上演B組首輪大戰，阿根廷硬撼哥倫比亞。兩軍實力相差唔遠，加上同組對手巴拉圭及卡塔爾威脅有限，如無意外兩者應可攜手晉級，首場比賽大家都唔想輸，相信會踢得小心，波童推介中位數2.5球細盤。
（Now 650周日早上6時直播）
自從去年世盃16強出局，阿根廷曾經進入調整期，除王牌美斯暫別國家隊，接替森柏奧利掌帥印嘅史卡朗尼亦試用唔少新人，可惜球隊喺年初熱身賽以1比3輸畀弱旅委內瑞拉，表現未達預期，所以史帥今次重召阿古路、迪馬利亞等舊將協助美斯，感覺重回舊路。阿根廷上場熱身賽雖大勝尼加拉瓜5比1，不過對手太弱未能作準，預計首次領軍出戰大賽嘅史卡朗尼唔會太冒險，穩陣行先。
哥倫比亞喺上年世盃後亦出現人事變動，執教逾6年嘅阿根廷籍主帥柏加文離任，至今年初始聘用前伊朗教頭奎羅斯接手。呢位葡萄牙籍主帥上任後領軍4場獲3勝1負，表現穩定。進攻靈魂占士洛迪古斯於剛過去球季喺拜仁長居後備，狀態存疑，加上箭頭法卡奧未復當年勇，今屆隨時要靠冇咩國際賽經驗嘅阿特蘭大前鋒杜雲沙柏達數胡，鋒力自然差啲。
奎羅斯將防守理念注入哥軍
奎羅斯以往執教伊朗都係靠防守起家，相信會將佢嘅防守意念帶到哥倫比亞。由於同組其餘兩支對手巴拉圭及卡塔爾實力差一皮，阿根廷及哥倫比亞只要發揮正常，好大機會攜手晉級，今場和波對大家都冇壞，冇需要急於求勝打殘自己，2.5球入球細有1.54倍值得熱捧。
