法國舉行嘅女子世盃C組最後一輪賽事，意大利女足鬥巴西女足。意大利兩戰全勝已進身16強，巴西今場至少要拎多1分先可確保出線，不過為免16強遇上較強對手，相信雙方會拚盡爭首名，今場波童揀入球大。（周三凌晨3時開賽）
現時C組形勢，意大利有6分肯定出線，巴西、澳洲同得3分，3隊都有機會攞到小組首名，由於C組首名出線16強只係對其他組別嘅小組第3名，相比下次名出線對手會係A組次名，離唔開東道主法國或挪威，故此上述3隊都會搏盡搶首名。
意大利今屆以國內勁旅祖雲達斯做班底，頭兩場憑着祖記鐵三角邦娜絲亞、姬莉蓮（圓圖）及嘉莉包辦7個入波，先後以2比1反勝澳洲及5比0大炒牙買加；巴西上輪領先兩球下畀澳洲反勝3比2，防線唔夠集中，不過五朝元老姬絲蒂安妮今屆2戰已轟入4球，加上女球王瑪達上場正選上陣亦已開齋，火力全開下唔怕同意大利鬥攻，大盤好路。
澳洲食住度氣剝「牙」
同組另一場同時間開波賽事，牙買加女足鬥澳洲女足。牙買加僅餘數字上出線機會，佢哋今屆兩戰全敗吞8蛋，擺明志在參與。澳洲上場反勝巴西打起信心，而且如果巴西另一邊廂贏波而澳洲今場大勝的話，有機會憑較佳得失球差升上小組首名，必定唔會收韁，捧讓球客勝。
