另一場A組賽事玻利維亞遇上秘魯。經首輪所見，玻利維亞仲未搵到進攻良方，而秘魯亦係靠法芬同荷西古里路兩位老將撐場，破關能力同樣有限，戰況隨時陷膠着，捧中位數2.5球嘅入球細划算。
（Now 650周三清晨5時30分直播）
齋睇人腳牌面，秘魯應該比玻利維亞稍為佔優，畢竟有喺西甲搵食嘅守將路爾斯艾雲古拿坐鎮後防，防線實力有番咁上下。可惜球隊進攻仲要依賴法芬同荷西古里路兩位老大哥，佢哋職業生涯曾經遊歷各大歐洲聯賽，經驗固然豐富，不過兩人歲數加埋近70歲，體能始終有限，首戰對住委內瑞拉都入唔到波，今場想有突破演出並唔容易。
玻軍近7戰6場捧蛋
玻利維亞今屆出戰美洲盃陣容主要以效力國內聯賽嘅球員為主，稍微具名氣嘅箭頭馬些路摩連奴，現時都只係喺踢緊中甲石家莊永昌，質素可想而知。佢哋上輪面對東道主巴西全場受壓，前面單靠馬些路摩連奴單打獨鬥，嚴重缺乏支援，加上對上7仗賽事得一場有「士哥」，其餘6場全捧蛋，啞火情況嚴重，今仗捧入球細好過。
