女子世盃今晚分別上演E及F組煞科戰。頭場荷蘭女足鬥加拿大女足。兩軍同樣兩戰得6分篤定出線，得失球差亦一樣，惟荷蘭得球較多，今場和波就能保住首名資格晉級；加拿大連續兩場冇失波防守硬淨，加上佢哋穩守突擊戰術夠實際，恰死唔少強隊。兩隊近4次交手加拿大都保不敗，當中有3次總入球開2球或以下，細盤值追。
（有線604台周五凌晨零時直播）
瑞典實而不華細頂美國
至於F組形勢同E組相似，美國及瑞典都係兩戰全勝篤定出線，最後一場正面交手爭首名。美國得失球差大幅領先，今場和波足以首名出線，佢哋上場對智利大輪換，同首場大炒泰國13比0嘅正選陣容作出7個調動，結果都能輕勝3比0，顯示正選同後備都咁弗，不過瑞典向來實而不華，絕非冇還擊之力。兩軍連續第3屆世盃都碰過頭，對上兩次瑞典攞到1勝1和，而且近5次交手瑞典亦只係輸過1次，5次全開2球或以下，今場可以講係五五波，同樣捧入球細。
（周五凌晨3時開賽）
