明早美洲國家盃C組次輪賽事，厄瓜多爾將會惡戰智利。厄瓜多爾出師不利首戰輸波，呢場仲有主力守將荷西昆特路停賽，形勢唔樂觀；相反爭取衞冕嘅智利繼續表現出美洲盃强隊本色，有望繼首勝之後再下一城，客W值博。
（Now650及Now E周六早上7時直播）
力爭美洲盃3連霸嘅智利，首輪以4比0大破日本，射手伊度亞度華加斯梅開二度，成功取代傳奇射手沙拉斯，以12球成為智利美洲盃史上入波最多嘅球員，過去一季喺曼聯表現低迷嘅王牌阿歷斯山齊士（A山），亦用1入球1助攻嘅出色表現，力證自己依然係世界級攻擊手，狀態明顯弗番唔少，為進一步靠今屆賽事翻身，「A山」呢仗肯定繼續搏盡搶攻。
厄瓜多爾質素輸一截
厄瓜多爾首戰全場處於被動，最終慘吞烏拉圭4蛋，仲有後衞荷西昆特路攞紅牌被逐，呢場冇份踢，令原本不穩嘅防線更加弱不禁風，加上隊中大部分球員喺美洲聯賽搵食，質素認真麻麻。睇番智利近年喺美洲盃踢到風生水起，近7場美洲盃法定時間取6勝1和，呢場乘勝追擊問題不大，客勝係不二之選。
